Ғолибияти “Истиқлол” бар дастаи ҷавонони “Вахш”

Душанбе, 01.07.2015, (АМИТ- «Ховар»  Меҳрони  Қурбон).-Қисми аввали мусобиқаи ҳайати ҷавонони дастаҳои лигаи олии Тоҷикистон ҳам ба охир расид. Ҳайати ҷавонон ё ки ҳайати дуюми дастаи  “Истиқлол”-и пойтахт ҳамчун ҳайати асосии даста қисми аввалро бе бохт анҷом доданд. Ёдовар мешавем, ки шогирдони Баҳодур Сӯфиев дар ҳашт бозӣ ғолиб шуда, танҳо як вохӯриро мусовӣ анҷом доданд.
Дар даври охири қисми якуми мусобиқа ҳайати дуюми дастаи “Истиқлол”-и пойтахт бар ҷавонони  дастаи “Вахш” бо ҳисоби бузурги 4 бар 1 дастболо шуданд. Дар ҳайати ҷавонони дастаи  “Истиқлол” Бледа Родригес ва Амирҷон Сафаров ба задани ду голӣ муваффақ шуданд.
Бояд зикр  кард, ки  ҷавонони “Истиқлол” бо  гирифтани  25 имтиёз  пешсафи ягонаи ҷадвали мусобиқа шуданд.  Хотиррасон  менамоем, ки ҳайати ҷавонони дастаи “Регар-ТадАЗ”, ки   зинаи дуюми ҷадвали мусобиқаро ишғол мекунад, нисбат ба ҷавонони “Истиқлол” 9 имтиёз камтар дорад. Дар зинаи сеюм   бо 14 имтиёз ҳайати ҷавонони дастаи “Хуҷанд” қарор дорад.