Ошкор гардидани 61 млн. сомонӣ зарари молиявӣ

     Душанбе, 27.07.2015.(АМИТ “Ховар”, Марзия Саидзода).- Дар 23 вазорату кумитаҳои ҷумҳурӣ ва сохторҳои тобеи онҳо дар ин давра аз ҷониби кормандони Агентии назорати давлатии молиявӣ ва мубориза бо коррупсияи Ҷумҳурии Тоҷикистон 162 тафтишу санҷиши фаъолияти молиявию хоҷагидорӣ ва ҳолати истифодаи самарабахши маблағҳои буҷетӣ гузаронида шудааст. Зимни ин тафтишу санҷишҳо  61 млн. сомонӣ зарари молиявӣ ошкор гардида, аз он  23 млн. сомонӣ барқарор гардид,- гуфт зимни нишасти матбуотӣ ба хабарнигорон муовини аввали директори Агентии назорати давлатии молиявӣ ва мубориза бо коррупсияи Ҷумҳурии Тоҷикистон Аъламхон Наимӣ.
Таҳлилҳо нишон доданд, ки камбудию норасоиҳои зиёди молиявӣ хусусан дар Агентии  захираҳои моддии давлатӣ, Бонки давлатии амонатгузории «Амонатбонк», вазоратҳои корҳои дохилӣ, саноат ва технологияҳои нав, энергетика ва захираҳои об, нақлиёт, маориф ва илм роҳ дода шудаанд. Таъкид шуд, ки яке аз сабабҳои асосии роҳ додан ба ин камбудиҳо, таъмин накардани назорати дохилиидоравии самарабахш, истифодаи маблағу воситаҳои давлатӣ аз ҷониби вазорату идораҳо ва дигар субъектҳои хоҷагидории давлатист. 
Ҳамзамон дар ин давра аз ҷониби кормандони агентӣ дар панҷ Маркази идораи лоиҳаҳои инвеститсионӣ тафтиши фаъолияти молиявию хоҷагӣ анҷом дода шуд, ки дар маҷмӯъ 2,3 млн. сомонӣ зарари молиявӣ ошкор гардид.
Инчунин тафтиши фаъолияти молиявӣ ва хоҷагӣ дар корхонаҳои зертобеи ШСХК «Барқи Тоҷик» ҳолатҳои камомад ва тасарруф, дуздии неруи барқ, изофанависӣ дар корҳои сохтмонӣ, ҳисоббаробаркунии беасосу ғайриқонунии андоз бо ташкилоти буҷетӣ ва дар маҷмӯъ зарари молиявӣ ба маблағи 6,7 млн. сомонӣ ошкор  шудааст, ки аз ин 4 млн. сомонӣ ба буҷет ва корхона барқарор карда шуд. Хусусан тафтиши фаъолияти молиявию хоҷагӣ дар силсиланеругоҳҳои барқи обии Вахши шаҳри Сарбанд зарари молиявиро ба маблағи 810 ҳазор сомонӣ ошкор намуд.