Пешниҳоди 160 санад барои шикори ғайриқонунӣ

Душанбе, 21.07.2015. (АМИТ “Ховар”, Раъно Нусратуллозода).-Дар нимсолаи аввали соли ҷорӣ  аз тарафи хоҷагиҳои низоми Агентии хоҷагии ҷангали назди Ҳукумати Ҷумҳурии Тоҷикистон ба маблағи зиёда аз 55 ҳазор сомонӣ корҳои биотехникӣ оид ба беҳдошти олами ҳайвонот амалӣ шуданд. Ин матлабро имрӯз директори агентии мазкур Азизулло Исматзода зимни нишасти матбуотӣ иброз дошт.

     Дар самти пешгирии ҳодисаҳои шикори ғайриқонунӣ 160 санад бо маблағи зарари умумии 8 ҳазору 795 сомонӣ тартиб дода шуда, пурра ситонида шуд. Ҳамчунин аз тарафи шуъбаи агентӣ ба дӯстдорони шикор 158 роҳхати шикорӣ бо маблағи 9 ҳазору 833 сомонӣ дастрас шудааст.