Роҳандозии таҳсилоти олии касбӣ аз рӯи меъёрҳои ҷадид

Душанбе, 28.07.2015. (АМИТ «Ховар», Ситораи Боймурод).- Омода намудани мутахассисон дар филиали Донишгоҳи давлатии Маскав ба номи М. В. Ломоносов  дар шаҳри Душанбе аз аввали сол аз рӯи меъёрҳои таълимии насли дуюм ва сеюм ба роҳ монда шуд. Ҳоло нақшаҳои таълимии нав мувофиқи меъёрҳои таълимии давлатии федералии таҳсилоти олии касбӣ таҳия ва ба тасвиб расонида шудаанд. Ҳоло дар филиал донишҷӯён аз рӯи шаш равия: «Химия, физика ва механикаи мавод», «Математикаи амалӣ ва барномасозӣ», «Геология», «Идоракунии давлатӣ ва маҳаллӣ», «Муносибатҳои байналмилалӣ» ва «Лингвистика» таҳсил доранд,- иброз дошт директори Донишгоҳи давлатии Маскав ба номи М.В. Ломоносов дар шаҳри Душанбе Алексей Реймерс имрӯз, 28 июл зимни нишасти хабарӣ.
Ба иттилои манбаъ, дар соли равон филиали ДДМ ба номи М. В. Ломоносови шаҳри Душанберо 137 мутахассиси ҷавон бо муваффақият хатм намуда, 21 нафараш сазовори дипломи аъло  гашт, ки нисбат ба шумораи умумии хатмкунандагон 15,3 фоизро ташкил дод.
Гуфта мешавад, ки шумораи умумии донишҷӯёни филиали ДДМ ба номи М. В. Ломоносов дар шаҳри Душанбе то охири соли таҳсил 558 нафарро ташкил дод.