Саҳми назарраси олимон ва устодони ДСХ дар рушди илм

Душанбе, 3.07.2015. (АМИТ “Ховар”, Раъно Нусратуллозода).-Дар соли 2015 дар донишкада дар самти фаъолияти илмӣ-тадқиқотӣ корҳои зиёде анҷом дода шуданд. Қариб дар ҳамаи соҳаҳо, аз ҷумла дар тадқиқоти илмӣ, таҳияи китобҳои дарсию методӣ, татбиқи лоиҳаҳои инноватсионӣ, ташкили марказу парки технологӣ пешравиҳо мушоҳида шуданд. Ин матлабро имрӯз зимни нишасти матбуотӣ ректори Донишкадаи соҳибкорӣ ва хизмат Диловар Қодиров баён кард. 
Д. Қодиров иброз дошт, ки соли 2015 олимон ва устодони донишкада 5 монографияи илмӣ, 2 китоби дарсӣ, 18 дастури методӣ, 34 воситаи таълимӣ, 167 мақолаи илмӣ, 34 фишурда ва 41 мақолаи илмӣ-оммавӣ,  дар маҷмӯъ 301 номгӯй маводро аз чоп бароварданд.
Дар шашмоҳаи аввали соли 2015 дар донишкада конфронси илмӣ-амалии байналмилалии муштарак дар якҷоягӣ бо Донишгоҳи техникии шаҳри Лутски Украина, 4 конфронси илмӣ-амалии ҷумҳуриявӣ, аз ҷумла 1 конфронс бо дастгирии намояндагии хазинаи Фридрих Эберт дар Тоҷикистон  доир шуд. 
Дар ин давра 7 донишҷӯи донишкада дар даври ниҳоии олимпиадаи ҷумҳуриявии донишҷӯёни муассисаҳои таҳсилоти олии касбии Ҷумҳурии Тоҷикистон барои дарёфти “Ҷоми Академияи илмҳои Ҷумҳурии Тоҷикистон” ширкат варзида, 3 нафар бо ифтихорномаҳои АИ ҶТ қадрдонӣ шуд. Дар озмуни ҷумҳуриявии «Навовари беҳтарин» 4 устоди ҷавони донишкада барои дастовардҳои илмию амалӣ бо  ифтихорномаҳои Вазорати маориф ва илм қадрдонӣ гардиданд.