«Сафина»-ро дар 50 кишвари ҷаҳон тамошо мекунанд

  Душанбе, 08.07.2015.(АМИТ «Ховар», Марзия Саидзода).-Барномаҳои телевизиони «Сафина» -ро,  ки яке аз шабакаҳои бонуфузи телевизионӣ дар фазои иттилоотии кишварамон маҳсуб мешавад, тавассути шабакаи моҳворавӣ дар 50 кишвари ҷаҳон ва аз тариқи шабакаи Интернет (онлайн) дар саросари дунё тамошо менамоянд.
      Ҳоло доираи фарогирии мавҷи  телевизиони «Сафина», ки соли равон аз таъсиси он даҳ сол сипарӣ мегардад, дар миқёси кишвар 92, 7 %-ро ташкил медиҳад. 
      Мудири телевизиони «Сафина» Зевар Давлатзода 8 июл  зимни нишасти матбуотӣ бо хабарнигорон дар Душанбе гуфт, ки мо кӯшиш менамоем, дар оянда бо омода намудани барномаҳои ҷолибу дидании фарҳангӣ шумораи  тамошобинони «Сафина»-ро афзоиш дода, дар дохили кишвар то ба 8 миллион расонем. Ин аз фаъолияти кории мо вобастагии калон дорад. Дар ин самт мо бояд ҷиддӣ кор кунем.
        Дар мавриди рақобат байни  шабакаҳои телевизионии кишвар роҳбари «Сафина» афзуд, ки чунин рақобат бояд бошад ва ман ҷонибдори рақобати солими эҷодиам. Дар ин маврид бояд тамоми гурӯҳҳои эҷодӣ барои омода намудани барномаҳои ҷолибу диданӣ сафарбар гарданд. 
_-Ман дигар шабакаро тамошо намекунам,- гуфт Зевар Давлатзода.  Аз оинаи нилгун танҳо шабакаи «Сафина»-ро тамошо менамоям, то эҳсос кунам, ки рейтинги «Сафина» чӣ гуна аст, чӣ камбудию норасоиҳо ва зиёдаравиҳо дар барномаҳо вуҷуд доранд, чӣ бояд кард, ки барномаҳо ҷолиби диққат ва  сертамошобин гарданд. Ин масъала ҳамеша дар мадди назари ман қарор дорад,- афзуд ӯ.