Шаҳрвандон ҳуқуқҳои худро пуштибонӣ мекунанд

Душанбе, 30.07.2015. (АМИТ «Ховар»). «Дар давоми шаш моҳи аввали соли ҷорӣ ба Ваколатдор оид ба ҳуқуқи инсон аз тарафи шаҳрвандони ҷумҳурӣ 1599 муроҷиат ворид шудааст. 
Имрӯз дар шаҳри Душанбе Ваколатдор оид ба ҳуқуқи инсон Зариф Ализода барои журналистони ватаниву хориҷӣ нишасти матбуотӣ баргузор намуд, ки дар он аз фаъолияти дастгоҳи Ваколатдор оид ба ҳуқуқӣ инсон ва қабулгоҳҳои ВҲИ дар давоми нимсолаи аввали соли 2015 ҳисобот дода шуд. Зикр шуд, ки шаҳрвандон бештар бо масъалаҳои ҳуқуқ ба манзил, ҳуқуқ ба таъминоти иҷтимоӣ, муҳокимаи одилонаи судӣ, ҳуқуқи инсон ва мақомоти ҳифзи ҳуқуқ, инчунин бо шикоятҳо нисбат ба мақомоти судӣ — 70 ҳолат ва мақомоти корҳои дохилӣ — 20 ҳолат муроҷиат карданд.
Зариф Ализода ба савол дар хусуси он ки чаро аз болои мақомоти судӣ шикоят ба унвони Ваколатдор оид ба ҳуқуқи инсон бештар ворид шудааст, ҷавоб дод, ки: «Ҳар як шаҳрванд ҳуқуқ дорад манфиатҳои худро ҳимоя кунад ва мо дар навбати худ ҷонибдори он ҳастем, ки ҳуқуқи инсон дар мақомоти судӣ риоя гардад, бинобар ҳамин зиёд шудани муроҷиати шаҳрвандонро нишонаи он медонем, ки шаҳрвандон ҳуқуқҳои худро медонанду аз он пуштибонӣ мекунанд. Ин падидаи хуб аст», — хулосабарорӣ кард З.Ализода.