Созишномаи Тоҷикистону Фаронса оид ба сохтани манораи назоратӣ дар фурудгоҳ

Душанбе, 13.07.2015 (АМИТ «Ховар», Фарзонаи Давлат).-Имрӯз дар Вазорати нақлиёти Тоҷикистон маросими имзои Созишнома миёни Ҳукумати Ҷумҳурии Тоҷикистон ва Ҳукумати Ҷумҳурии Фаронса оид ба сохтани манораи назоратӣ дар «Фурудгоҳи байналмилалии Душанбе» доир гардид.
Ба созишнома вазири нақлиёти Тоҷикистон Шералӣ Ганҷалзода ва Сафири Фавқулода ва Мухтори Фаронса дар Тоҷикистон  Дидйе Леруа имзо гузоштанд.
Ҷонибҳо баъди имзои созишнома аз ҳамкорӣ байни Тоҷикистону Фаронса изҳори қаноатмандӣ намуда, зикр доштанд, ки созишномаи мазкур метавонад ҳамкорӣ ва равобити дипломатии ду кишварро боз ҳам мустаҳкам намояд.
Созишнома миёни Тоҷикистону Фаронса ҷиҳати ба истифода додани манораи назоратӣ дар «Фурудгоҳи байналмилалии Душанбе» аз ҷониби Вазорати мудофиаи Фаронса маблағгузорӣ шуда, бехатарии  парвозҳоро таъмин хоҳад кард.
Ёдрас мешавем, ки аз ин пеш дар асоси  ҳамкории байниҳукуматии Тоҷикистону Фаронса аз ҷониби Фаронса дар «Фурудгоҳи байналмилалии Душанбе» терминали замонавӣ ва парк барои ҳавопаймоҳо ба истифода дода шуд.