Суғд: 7 нафар аз ҷониби оташнишонон наҷот дода шуд

Хуҷанд, 20.07.2015. АМИТ «Ховар», Абдуаҳад Шарифзода).-Дар 6 моҳи соли ҷорӣ дар миқёси вилояти Суғд 176 ҳодисаи нохуши сӯхтор ба қайд гирифта шудааст. Тавре ки ба АМИТ “Ховар”  аз раёсати Хадамоти давлатии оташнишонии вилоят иттилоъ доданд,  аз оғози соли ҷорӣ дар қаламрави вилоят нисбат ба ҳамин давраи соли 2014(174)  ду адад зиёд ҳодисаи нохуши сӯхтор ба амал омада, маблағи зарар наздик  ба 858 ҳазор сомониро ташкил дод. (2014 — 1 млн. 377 ҳазор)
Дар натиҷаи ин сӯхторҳо  аз 5 сокини вилоят се нафар дар ҳолати мастӣ ва 1 кӯдаки хурдсол ҳалок гашта, 7 нафар аз ҷониби оташнишинон наҷот дода шуд. 
Аз шумораи умумии сӯхторҳои ба амал омада 141 адад ё ин ки 80% он дар манзилҳои истиқоматии сокинон ба амал омадааст, ки сабаби асосии он риоя накардани қоидаҳои техникаи бехатарӣ   аз ҷониби сокинон мебошад.