Суғд: Ҷамъоварии ғалладонагиҳо вусъат меёбад

Суғд, 8.07.2015. (АМИТ «Ховар», Тоҳирҷон Искандарзода).-Кишоварзони вилояти Суғд имрўзҳо дар маъракаи муҳими ҷамъоварии ҳосили ғалладонагиҳо қарор доранд. Аз 92 ҳазору 142 гектари кишти ғаллагиҳои хўшадори барои соли 2015 гузаронидашуда, то ба имрўз дар майдони 34 ҳазору 120 гектар дарав гузаронида шудааст, ки 37 дар сади майдони киштро ташкил медиҳад.  Истеҳсоли ғалладонагиҳо то ба имрўз 72 ҳазору 560 тоннаро ташкил медиҳад, ки нисбат ба соли гузашта 23 ҳазор тонна  зиёд мебошад.   Аз ғаллагиҳои истеҳсолшуда 47 ҳазору 180 тоннаашро гандум ташкил медиҳад.
Дар ин маъракаи муҳим шаҳру ноҳияҳои Конибодом, Зафаробод,  Спитамен, Ҷ. Расулов, Ашт пешсаф буда, нақшаи дарави ғаллагиҳо иҷро ва дар арафаи иҷро мебошад.
    Дар ноҳияҳои наздикўҳӣ дарави ғалладонагиҳо оғоз гардида, рўз аз рўз вусъат мегирад. Ҳосилнокиҳои ғалладонагиҳо дар шаҳру ноҳияҳои Исфара, Б. Ғафуров, Спитамен нисбат ба дигар ноҳияҳо зиёд буда, аз 30 то 44 сентнер аз ҳар гектарро ташкил медиҳад.
  Дар майдонҳои аз дарави ғалла баромада чун анъана кишти такрории зироатҳо гузаронида мешавад. То ба имрўз дар вилоят дар майдони зиёда аз 8 ҳазору 200 гектар кишти такрорӣ  гузаронида шудааст.