Суғд: Кумаки аъзои ҲХДТ ба осебдидагони ВМКБ

Душанбе,  27.07.2015 (АМИТ «Ховар», Рафоати Абдулҳамид).- Бино ба иттилои Хадамоти матбуоти раиси вилояти Суғд, Кумитаи иҷроияи ҲХДТ дар вилояти Суғд ва кумитаҳои ҲХДТ дар шаҳру навоҳии вилоят ба хотири дастгирии мардуми минтақаи ВМКБ, ки бар асари боронгариҳои зиёд ва омадани сел аз манзилҳои истиқоматии хеш маҳрум монданд, кумак расониданд.
Тавре ки аз Кумитаи иҷроияи ҲХДТ дар вилояти Суғд хабар доданд, аъзои ин ҳизб ба хотири дастгирии сокинони аз офати табиӣ зарардида даҳ ҳазор сомонӣ маблағ фиристоданд.
Бо дастгирии мақомоти иҷроияи ҳокимияти давлатии вилоят 210 нафар кӯдакону наврасон аз ноҳияҳои Шуғнон, Ванҷ ва Рашт, ки бар асари офатҳои табиӣ хонаводаи онҳо зарар дидааст, ба вилояти Суғд оварда мешаванд ва то замони бунёди хонаҳояшон дар истироҳатгоҳҳо ва макотиби вилоят ба фароғату таҳсил фаро гирифта мешаванд. Ба ин кӯдакон  лавозимоти зарурӣ тақдим мешавад ва онҳо аз ҷиҳати моддӣ таъмин хоҳанд буд.