Тақдими 100 китоб ба китобхонаи Кӯҳистони Масчоҳ

Хуҷанд, 27.07.2015. (АМИТ «Ховар»).-Маҳфили илмӣ-адабии «Ганҷи сухан» бо дастгирии Мақомоти иҷроияи ҳокимияти давлатии вилояти Суғд нишасти 129-уми худро дар ноҳияи Кӯҳистони Масчоҳ дар ҳузури сокинони ин ноҳияи дурдаст баргузор намуд. Гурӯҳи олимону адибонро аз шаҳри Хуҷанд сокинони Кӯҳистони Масчоҳ ва роҳбарияти мақомоти иҷроияи ҳокимияти маҳаллӣ бо самимияти афзун қабул намуданд.
Тавре ки аз хадамоти матбуоти раиси вилояти Суғд иттилоъ доданд, маҳфил дар деҳаи зебоманзари Ревомутк бештар аз 200 сокини ноҳияро гирди ҳам овард. 
Раиси ноҳия Муҳаммадҷобир Раҷабзода баргузории маҳфилро дар густариши фарҳангу адабиёт фоли нек арзёбӣ намуд. Пас аз шунидани маърӯзаҳои олимону шоирон ба китобхонаи ноҳиявии Кӯҳистони Масчоҳ аз номи раиси вилоят беш аз 100 дона китоби тозанашр ҳадя гардид.