Таҳкими оиладорӣ ва рушди фарҳанги хонаводагӣ

Душанбе, 11.07.2015. (АМИТ «Ховар», Раъно Нусратуллозода).- «Рушди неруи инсонӣ дар низоми таҳсилоти олии касбӣ : вазъ ва дурнамои он» ва «Таҳкими оиладорӣ ва рушди фарҳанги хонаводагӣ»- таҳти чунин унвонҳо 10  июл бо ибтикори Вазорати маориф ва илми Ҷумҳурии Тоҷикистон ду конфронси ҷумҳуриявии илмию амалӣ барпо шуд. Конфронсҳо дар партави Паёми Президенти Ҷумҳурии Тоҷикистон ба Маҷлиси Олии Ҷумҳурии Тоҷикистон ва бахшида ба 700-солагии алломаи Шарқ Мир Сайид Алии Ҳамадонӣ дар Донишкадаи ҷумҳуриявии такмили ихтисос ва бозомӯзии кормандони соҳаи маориф доир гардиданд.
Дар конфронс муовини аввали вазири маориф ва илм Раҳматулло Мирбобоев, сардорони раёсати дастгоҳи марказии вазорат, роҳбарони як зумра муассисаҳои таҳсилоти олии касбӣ, доираи васеи олимону муҳаққиқон ва омӯзгорону кормандони муассисаҳои таҳсилоти олии касбии кишвар иштирок намуда,   ҳамзамон беш аз 40 мавзӯъ дар бахшҳои гуногун мавриди муҳокима қарор гирифт.