Тартиботи ҳуқуқиро пурзӯр мебояд кард

Душанбе, 20.07.2015. (АМИТ «Ховар», Лайло Тоирӣ).- Масъалаи баланд бардоштани омодагии ҷангӣ, интизоми ҳарбӣ, пурзӯр намудани қонунияту тартиботи ҳуқуқӣ, пешгирии   сатҳи содиршавии ҷинояткорӣ, ҷо ба ҷогузории кадрҳои соҳавӣ ва дар ҳама мавсим ва фаслҳои сол ҳамаҷониба таъмин намудани хизматчиёни ҳарбӣ бо маводи хӯрокӣ, либос ва дигар амволи шайъиро  котиби Шӯрои амнияти ҷумҳурӣ Абдураҳим Қаҳҳоров, вазири мудофиаи мамлакат Шералӣ Мирзо, масъулини Сарпрокуратураи ҳарбӣ ва Агентии таъминоти амволи махсуси назди Ҳукумати Ҷумҳурии Тоҷикистон дар ҷаласаи  ҷамъбасти фаъолияти шашмоҳаи Вазорати мудофиа мавриди баррасӣ қарор доданд.
Дар ҷаласа вобаста ба рафъи монеаҳои мавҷуда, таъкид гардид, ки ҳар як хизматчии ҳарбӣ, новобаста аз рутба ва сатҳи вазифавӣ, яъне аз генерал то сарбози қаторӣ, бояд дар самти иҷрои уҳдадориҳо ва вазифаҳои рӯзмарраи хизматӣ бо масъулияти баланд муносибат намояд. 
Дар анҷоми ҷамъомад масъулини навъи қӯшунҳо ва роҳбарони баъзе аз ҷузъу томҳо вазифадор гардиданд, ки ҷиҳати рафъи монеаву мушкилоти мавҷуда тамоми тадбирҳои лозимиро роҳандозӣ намуда, назоратро аз рӯи фаъолият ва уҳдадориҳои хизматии зертобеиён пурзӯр намоянд.