Задухӯрди қочоқчиёни мусаллаҳи афғон бо сарҳадбонони тоҷик

Душанбе, 08.07.2015. (АМИТ «Ховар», Лайло Тоирӣ).- Дар  асоси маълумоти фаврӣ шаби  5 ба 6 июл соати 01:00 шаб наряди сарҳадӣ дар якҷоягӣ бо Гурӯҳи фаврии РКДАМ ҶТ дар вилояти Хатлон дар яке аз дидбонгоҳҳи сарҳадии Отряди сарҳадии «Ҳамадонӣ» дар қитъаи сарҳади Тоҷикистону Афғонистон гурӯҳи мусаллаҳи қочоқчиёни номаълуми афғонро  иборат аз 10-13  нафар дар вақти убури ғайриқонунии хати сарҳад ошкор намуд, ки дар натиҷа  байни қочоқчиён ва  сарҳадбонони тоҷик задухӯрди дарозмуддат  ба вуқӯъ пайваст.
 Тавре ки аз Маркази матбуоти  Сарраёсати қӯшунҳои сарҳадии КДАМ ҶТ  хабар доданд, сарҳадбонони тоҷик муқовимати шадид нишон доданд, ки дар натиҷаи он чанд нафар аз қочоқчиён захмдор шуда, ду нафари он  безарар гардонида шуд, боқимонда аз торикии шаб истифода бурда, аз тариқи қамишзор ақибнишинӣ намуда, ба тарафи Афғонистон баргаштанд. 
Ҳангоми азназаргузаронии ҷои ҳодиса зиёда аз 270 кг маводи мухаддири  чарс мусодира  шуда ва  ду ҷасади қочоқчии 35-40 солаи афғон муайян карда  шуд. 
Дар айни замон аз тарафи мақомоти дахлдори КДАМ ҶТ оид ба  ҳодисаи мазкур  тафтиш  ва корҳои фаврӣ идома доранд.