Барзиёд иҷро гардидани нақшаи андоз дар Норак

Норак, 15.2015 (АМИТ «Ховар», Субҳониддини Маҳмуд).-Нақшаи ҷамъоварии маблағҳои андоз ва боҷҳои давлатӣ дар шаҳри Норак 131,4  фоиз иҷро гардида, ба буҷет ба ҷойи 10,6 млн сомонӣ нақшаи пешбинишуда, 13,9 млн сомонӣ маблағ ворид гардидааст, ки нисбат ба  нақша  3,3 млн. сомонӣ  ва нисбат ба ҳамин давраи соли гузашта 3,9 млн сомонӣ зиёд мебошад.
Аммо  нақшаи қисми даромади буҷет иҷро гардида бошад ҳам, сифатнокии он таъмин нашуда,  як намуди андоз   ба пуррагӣ иҷро нагардид. Аз ҷумла, андози иҷтимоӣ 76,4 фоиз иҷро шуд, ки дар нисбати нақшаи пешбинигардида,  3,3млн  сомонӣ  кам  аст.
Қарздорӣ аз андоз ва боҷҳои давлатӣ то 1 июни соли ҷорӣ 299,7ҳазор сомонӣ, қарзи андози ҳифзи иҷтимоӣ 54,7 ҳазор сомониро  ташкил медиҳанд.       
Мутаассифона дар ин давра ҶСК «Бофандаи Норак» музди меҳнати  кормандонро натавонист сари вақт пардохт куна два  қарздорӣ аз музди  меҳнат  то 1 июни соли 2015 12,8 ҳазор сомониро  ташкил дод. 
Корхонаҳои саноатии шаҳр дар 6-моҳи соли 2015 ба  маблағи 706,9 млн  сомонӣ маҳсулот истеҳсол намудаанд, ки нисбат ба ҳамин давраи соли гузашта 147,1 млн  сомонӣ зиёд  ё ин ки  126,3 фоизро ташкил  медиҳад. Дар ин давра дар нерўгоҳҳои барқи обии Нораку  Бойғозӣ ба миқдори 6 млрд.кв/соат нерўи барқ истеҳсол шудааст, ки  105,3 фоизро ташкил дода, ки  нисбат ба ҳамин давраи соли гузашта 304,5 млн.кв/соат зиёд мебошад.