Дар Қундуз роҳбари гурӯҳи ифротии «Ҷундуллоҳ» маҳв гардид

Душанбе, 25.08.2015. (АМИТ «Ховар»). – Дар вилояти Қундузи Афғонистон бар асари зарбаҳои ҳавоӣ панҷ ҷангӣ, аз ҷумла, роҳбари гурӯҳи «Ҷундуллоҳ» Қорӣ Ғулом маҳв карда шуд. Дар ин бора оҷонсии хабарии «Хома пресс» иттилоъ медиҳад.
Амалиёти поксозиро Раёсати амнияти миллии Афғонистон дар минтақаи Ҷаҳордара анҷом дод, ки дар натиҷа бо ҳамроҳии Ғулом Ҳазрат 4 ҷангии тобеи ӯ, аз ҷумла муовинаш кушта шуданд. 
Дар Қундуз гурӯҳи «Ҷундуллоҳ» ҳамчун як қувваи мубориз бо мақомоти расмӣ маълум мебошад. Ҷангиёни он дар куштори даҳҳо нафар аз аҳолии осоишта даст доранд. 
Бояд зикр намуд, ки Қори Ғулом Ҳазрат ҳамчунин яке аз роҳбарони гурӯҳи ифротгарои «Ҳаракати исломии Ӯзбекистон» ба шумор мерафт. Ёдовар мешавем, ки ҲИӮ фаъолона бо Толибон ҳамкорӣ дошт, вале чанде пеш ба тарафи «Давлати исломӣ» гузашт.