Дарёфт ва мусодираи беш аз 9 кило маводи мухаддир

Душанбе, 19.08.2015 (АМИТ «Ховар», Фарзонаи Давлат).- Зимни гузаронидани чорабиниҳои фавриву ҷустуҷуӣ кормандони мақомоти корҳои дохилӣ марди 30-солаи сокини ноҳияи Шӯрободро бо гумони даст доштанаш  ба гардиши ғайри қонунии маводи мухаддир дастгир намуданд. Дар вақти кофтуков  аз ӯ 7 килою 644 грамм маводи нашъадори сахттаъсири героин дарёфт ва мусодира карда шуд. 
Ҳамчунин дар ҳудуди ноҳияи Рӯдакӣ низ зимни гузаронидани чорабиниҳои фавриву  ҷустуҷӯӣ кормандони милитсия ду нафар марди 46 ва 51-солаи ноҳияи мазкурро бо гумони муомилоти ғайриқонунии маводи мухаддир дастгир намуда, аз гумонбаршудагон 216 грамм маводи нашъадори героин дарёфт ва мусодира гардидааст. 
Ҳамин тариқ, зимни як чорабинии дигари фавриву ҷустуҷӯй дар вақти кофтукови марди 36-солаи сокини шаҳри Душанбе кормандони фаврӣ 1килою 398 грамм маводи нашъадори афюн дарёфт ва мусодира намудаанд.
Дар маҷмӯъ маводи нашъадор   мусодира гардида,  9 килою 258 граммро ташкил дод. 
Нисбати далелҳои зикргардида парвандаи  ҷиноятӣ оғоз шуда, тафтишот идома дорад.