Идомаи корҳои сохтмонӣ дар иншооти мақомоти ВКД

Душанбе, 06.08.2015 (АМИТ «Ховар»).- Субҳи имрӯз, вазири корҳои дохилии мамлакат Раҳимзода Рамазон Ҳамро аз рафти корҳои сохтмонии бинои иловагии сеошёнаи Раёсати Вазорати корҳои дохила дар вилояти Хатлон дидан намуд. Вазир ба сатҳ ва сифати корҳои сохтмонӣ шинос шуда, ба бинокорон  барои бо сифати баланд ва дар муҳлати муқарраршуда ба истифода додани иншооти мазкур тавсияҳо дод. Рамазон Раҳимзода ҳамчунин ба ҷараёни корҳои таъмиру таҷдид дар бинои Раёсати тиббии Вазорати корҳои дохилӣ дар вилояти Хатлон шинос шуда, барои бартараф намудани камбудию норасоиҳои ҷойдошта ба масъулин супоришҳо дод.
Бояд гуфт, ки бо дастгирии Президенти мамлакат Эмомалӣ Раҳмон ва кӯшишу талошҳои роҳбарияти ВКД давоми солҳои охир даҳҳо иншооти нав  ва биноҳои маъмурии мақомоти милитсия сохта, ба истифода дода шуданд. Айни замон корҳои сохтмонӣ ва таъмиру таҷдиди биноҳои мақомоти корҳои дохилӣ ва ҷузъу томҳои он дар қаламрави ҷумҳурӣ бомайлон ҷараён доранд, — гуфт ба АМИТ «Ховар» корманди масъули ВКД Маҳбуба Гулова.