Кумаки Кумитаи имдод ба зарардидагони Бадахшон

            Душанбе, 31.08.2015.(АМИТ «Ховар», Марзия Саидзода).-Намояндагии Кумитаи имдоди  имом Хумайнии Эрон дар Тоҷикистон  ба зарардидагони аз офатҳои табии навоҳии Вилояти Мухтори Кӯҳистони Бадахшон кӯмак мерасонад. Ин кӯмакҳо аз гилему болопӯшҳо, яхдон, маводи ғизоӣ аз қабили равған, биринҷ, шакар, макарон ва хокаи шустӯӣ иборат буда, онро масъулини  Кумитаи мазкур ба сокинони аз офатҳои табиӣ зарардидаи Вилояти Мухтори Кӯҳистони Бадахшон мерасонанд. 
            Зимни нишасти хабарӣ дар Душанбе сарпарасти кулли Кумитаи имдоди имом Хумайнӣ  Саидпарвизи Фаттоҳ, сафири Ҷумҳурии исломии Эрон дар Ҷумҳурии Тоҷикистон Ҳуҷҷатуллоҳ Фағонӣ доир ба таҳкими ҳамкориҳои мутақобилан судманди Тоҷикистону Эрон дар бахшҳои мухталиф ибрози назар намуданд. Саидпарвизи Фаттоҳ зикр кард, ки дар оянда намояндагии Кумитаи имдод дар Тоҷикистон фаъолияти худро тавсеа мебахшад. Зикр шуд, ки алҳол бо ибтикори намояндагии Кумитаи мазкур дар ҳамкорӣ бо ниҳодҳои марбутаи Тоҷикистон дар минтақаҳои гуногуни Тоҷикистон 134 коргоҳи омӯзишӣ таъсис дода шудааст, ки ин марказҳо ба шуғли муайян фаро гирифтани ҷавонон,  хусусан аз худ кардани ҳунарҳои дӯзандагӣ, сангтарошӣ, челонгарӣ нақши калон доранд.