Мавқеи гурӯҳи Ҳусиҳо дар Яман танг мегардад

Душанбе,12.08. 2015 (АМИТ «Ховар», Саидҷаъфар Ашӯрзод).-Ҷонибдорони Президенти Яман Абду Раббо Мансур Ҳодӣ қариб тамоми қисми ҷанубии  кишварро таҳти назорати худ қарор дода, барои ба даст оварднаи пойтахт, ки айни замон гурӯҳи ҷангиёни Ҳусиҳо онро идора мекунанд, ҳаракат доранд. Дар ин бора рӯзномаи «Ал-Васат»-и Баҳрайн иттилоъ дода, навиштааст: ҳоли ҳозир амалиётҳои мусаллаҳона дар минтақаҳои Дамар ва Ибб, ки бо қисми ҷанубии пойтахт,  шаҳри Санъо ҳаммарзанд, идома дорад. Неруҳои низомии Ҳукумати қонунии Яман тавонистаанд ноҳияҳои Атма ва Дамарро, ки дар тобеияти шаҳри Санъо мебошанд, пурра аз дасти гурӯҳи Ҳусиҳо озод намоянд.
 Ёдовар мешавем, муноқишаҳо  миёни гурӯҳи Ҳусиҳо ва неруҳои низомии президенти фирории Яман  Абду Раббо Мансур Ҳодӣ аз охирҳои моҳи марти соли равон инҷониб идома доранд ва як қатор минтақаҳои ин кишвар аз ҷониби гурӯҳи иттиҳоди  кишварҳои Шарқи Наздик мавриди ҳамлаҳои ҳавоӣ қарор гирифтаанд.