Мулоқоти Н. Зоҳидӣ бо сафирони Афғонистон ва Покистон

Душанбе, 28.08.2015 (АМИТ «Ховар»).- Имрӯз, 28-уми августи соли 2015 муовини вазири корҳои хориҷии Ҷумҳурии Тоҷикистон Низомиддин Зоҳидӣ сафирони Ҷумҳурии Исломии Афғонистон ҷаноби Абдуғафур Орзу ва Ҷумҳурии Исломии Покистон ҷаноби Тариқ Иқбол Сумроро ба ҳузур пазируфт. Зимни мулоқот сафирони кишварҳои дӯст ба муовини вазири корҳои хориҷӣ даъватномаи муштараки вазири корҳои хориҷии Ҷумуҳрии Исломии Афғонистон ҷаноби Салоҳиддин Раббонӣ ва мушовири нахуствазири Ҷумҳурии Исломии Покистон оид ба корҳои амнияти миллӣ ва хориҷӣ ҷаноби Сартоҷ Азизро унвонии вазири корҳои хориҷии Ҷумҳурии Тоҷикистон Сироҷиддин Аслов барои  иштирок дар Конфронси вазирони Қалби Осиё-Раванди Истамбул, ки 8 декабри соли ҷорӣ дар Исломобод зери унвони “як минтақаи осоишта, устувор, муттаҳид ва шукуфон” баргузор мегардад, супориданд. Муовини вазири корҳои хориҷӣ аҳамияти раванди мазкурро дар таъйини самтҳои афзалиятноки минтақавӣ бо Афғонистон баланд арзёбӣ намуда, минатдории худро барои даъвати ҷониби Тоҷикистон барои иштирок дар чорабинии мазкур изҳор намуд.