Мусобиқоти варзишӣ барои дарёфти Ҷоми фармондеҳ

       Душанбе, 19.08.2015.(АМИТ «Ховар», Марзия Саидзода).-Фардо, 20 август дар байни қисмҳои низомии Гвардияи миллии Ҷумҳури Тоҷикистон  мусобиқаҳои варзишӣ барои дарёфти Ҷоми фармондеҳи Гвардияи миллӣ оғоз меёбад.
   Аз шуъбаи иттилоот ва робита бо ҷомеаи Гвардияи миллии ҷумҳурӣ ба АМИТ «Ховар» иттилоъ доданд, ки  мусобиқоти варзишӣ ба ифтихори 20-умин солгарди таъсиси Гвардияи миллии Ҷумҳурии Тоҷикистон гузаронида мешавад. Дар мусобиқаҳои варзишӣ сарбозону афсарон ва беҳтарин варзишгарон аз рӯи намудҳои гуногуни варзиш,  назири футболу волейбол, якҳарбаи шарқӣ, гулӯлабардорӣ, зинабароӣ бо чӯб, турниккашӣ, бандкашӣ, тирпаронӣ ва гуштини миллӣ  қувваозмоӣ менамоянд. Тарғиби тарзи ҳаёти солим, дар рӯҳияи чолокию шуҷоатмандӣ ва садоқатмандона ба Ватан -Модар хизмат кардан аз ҳадафҳои асосии мусобиқоти варзишист.
      Ҳамзамон дар доираи истиқболи сазовори ҷашни 20-солагии таъсиси ин сохтори қудратӣ тибқи нақшаи ягонаи фармондеҳии Гвардияи миллӣ дар қисмҳои ҳарбӣ ва дигар ҷузъу томҳои ин ниҳоди мустақили ҳарбӣ чорабиниҳои  гуногуни фарҳангӣ  идома дорад. Доир намудани викторина — санҷиши зеҳнӣ дар бораи таърихи 20-солаи ниҳоди мазкур аз ҳамин қабил аст. Дар асоси низомнома ба саволҳои викторина иштирокдорон — сарбозону сержантҳо ҷавоб дода, соҳиби холҳо мешаванд. Баъдан дастаҳои ғолиб ва иштирокчиёни беҳтарин аз рӯи натиҷаи холҳои бештар муайян мегарданд. Алҳол ин чорабиниҳо хеле шавқовар ҷараён дошта, ғолибони викторина ва мусобиқаҳои варзишӣ дар рӯзи таҷлили ҷашни 20-солагии таъсиси Гвардияи миллӣ бо  ифтихорномаю туҳфаҳои арзишнок ва дастаҳои ғолиб бо Ҷоми фармондеҳи Гвардияи миллӣ сарфароз мегарданд.