Омодагиҳо барои таҷлили «Рӯзи соҳибкор»

Душанбе, 21.08.2015. (АМИТ «Ховар»).- Тавре ки ба АМИТ «Ховар» аз Ҳукумати мамлакат иттиллоъ доданд, имсол, дар доираи таҷлили нахустин солгарди «Рӯзи соҳибкор» баргузории «Форуми байналмилалии соҳибкории Душанбе-2015» ба нақша гирифта шудааст. Форуми байналмилалӣ таҳти шиори «Саҳми соҳибкориву сармоягузорӣ дар рушди устувор» моҳи октябри соли равон баргузор шуда, барои иштирок дар он соҳибкорону сармоягузорони бурунмарзӣ, роҳбарони созмонҳои байналмилалии молиявӣ, намояндагони баландпояи кишварҳои хориҷӣ ва дигар шарикони иқтисодӣ даъват мешаванд.
Барои таҷлили бошукӯҳи «Рӯзи соҳибкор» ва дар сатҳи баланд баргузор намудани Форуми байналмилалӣ Кумитаи тадорукот таҳти роҳбарии Давлаталӣ Саид — муовини якуми сарвазири мамлакат таъсис дода шудааст. Кумитаи тадорукот ҷаласаи якуми худро баргузор намуда, бо роҳбарони Кумитаи андоз, Бонки миллӣ, Палатаи савдо ва саноат, агентии «Тоҷикстандарт», Хадамоти алоқа ва дигар вазорату идораҳои дахлдор нақшаи чорабиниҳоро мавриди баррасӣ ва муҳокима қарор дод.
Ёдовар мешавем, ки бо ташаббуси Президенти мамлакат, Эмомалӣ Раҳмон, бо назардошти саҳми соҳибкорон дар рушди иқтисоди миллӣ санаи 14-уми октябр ҳамчун «Рӯзи соҳибкор» эълон гардида, тағйиру иловаҳои зарурӣ ба Қонуни Ҷумҳурии Тоҷикистон «Дар бораи рӯзҳои ид» ворид карда шудааст.