Садамаҳои нақлиётии марговар

Душанбе, 26.08.2015 (АМИТ «Ховар»).-Аз уҳдаи автомашина набаромадан ва ба ҳам хурдани автомашинаҳо ҷони ду нафарро аз байн бурд.
Бино ба иттилои раёсати бозрасии давлатии автомобилии Вазорати корҳои дохилии кишвар, 25-уми августи соли равон ронандаи автомашинаи тамғаи “Мерседес-Бенс”, марди 38-солаи сокини ноҳияи Ҳисор, ҳангоми ҳаракат аз самти шаҳри Турсунзода ба самти ноҳияи Шаҳринав, дар ҳудуди ҷамоати Қаратоғ аз ӯҳдаи идораи воситаи нақлиёт набаромада, ба автомашинаи тамғаи “Мерседес-Бенс”, ки ба марди 44-солаи сокини шаҳри Турсунзода тааллуқ дорад, бархӯрда, пиёдагард, марди 69-солаи сокини ҷамоати Қаратоғро пахш намудааст. Дар натиҷа пиёдагард ҷароҳати вазнини ҷисмонӣ бардошта, дар ҷойи ҳодиса ба ҳалокат расидааст.
Ҳамчунин дар ин рӯз, ронандаи автомашинаи тамғаи “Хундай-Туксон”, марди 26-солаи сокини ноҳияи Панҷ, ҳангоми ҳаракат аз тарафи кӯчаи Сино ба самти кӯчаи Ҷ.Расулови шаҳри Душанбе, аз ӯҳдаи идораи воситаи нақлиёт набаромада, пиёдагард, ҷавони 18-солаи сокини ноҳияи Ҳамадониро пахш намудааст. Дар натиҷа пиёдагард ҷароҳати вазнини ҷисмонӣ бардошта, ҳангоми ба беморхона дастрас намудан, дар роҳ ба ҳалокат расидааст.