Шуғли бофандагӣ барои занони шаҳраки хаймавӣ дар Шуғнон

  Хоруғ 18.08.2015 (АМИТ «Ховар» Файз Мирҳасан).- Занони   шаҳраки навбунёди «Хайробод»-и  ҷамоати Сучон  дар   шароити хайма ба  равнақи ҳунарҳои бофандагӣ  даст заданд. Имрӯз маҳсулоти  бофандагии ин ҳунармандон дар бозор ба фуруш гузошта шудааст. 
    Иқдоми ба кор ҷалб кардани занони шаҳрак бо ташаббуси  шӯъбаи агентии  шуғли аҳолии ноҳияи Шуғнон рӯи даст гирифта шуд.  Айни ҳол  20 нафар  аз  занони  ин маҳал  ба  ҷӯроббофиву  таркдӯзиҳои суннатӣ  машғуланд. 
      Ба гуфтаи масъулини шӯъбаи агентии шуғли аҳолии ноҳияи Шуғнон риштаву ресмон ва дигар маводҳои  бофандагӣ аз сӯи агентии мазкур  таъмин карда мешавад. 
Гурӯҳе аз бонувони ҳунарманд  иқдоми шӯъбаи агентии шуғли аҳолии ноҳияи Шуғнон саривақтӣ буда,  он   аз як сӯ ба коҳиши сатҳи бекорӣ дар шаҳраки навбунёди «Хайробод» мусоидат кунад, аз сӯи дигар  барои ғани гардондани  даромади оилавӣ  кумак мерасонад.  Ҳунармандони  ҳунарҳои дастӣ ният доранд, ки  бо истифода аз шароити мусоид  ҳунари бофандагиро  дар байни ҷавондухтарони ин маҳал  низ ташвиқ диҳанд.