Суғд: Озмуни вилоятӣ идома дорад

Душанбе, 04.08.2015. (АМИТ «Ховар», Ситораи Боймурод).- Дар Маҷмааи таърихию фарҳангии «Қалъаи Хуҷанд» дар доираи озмуни вилоятӣ барномаи ҳунарии аҳли санъат ва фарҳанги шаҳри Конибодом манзури сокинони маркази вилоят ва ҳакамон гардонида шуд.
Тавре маркази матбуоти раиси вилояти Суғд хабар медиҳад, муҳтавои барномаи дастаи ҳунарии шаҳри Конибодом аз намоиши либосҳои занона ва мардонаи қадимаи миллӣ, иҷрои навозиши умумӣ, суруди якка, суруди ҳаҷвӣ ва дигар шартҳои озмун иборат буд.
Озмуни вилоятии «Ҳунарнамоии беҳтарини шаҳру навоҳии вилоят» рӯзҳои истироҳат дар Маҷмааи таърихю фарҳангии «Қалъаи Хуҷанд» баргузор мегардад ва дастаҳои ҳунарии шаҳру ноҳияҳои вилоят ба навбат ҳунарнамоӣ мекунанд.
Ёдовар мешавем, ки ғолибони озмун барои ҷои якум бо 5 ҳазор сомонӣ, ҷои дуюм 3 ҳазор сомонӣ ва ҷои сеюм 2 ҳазор сомонӣ мукофотонида мешаванд.