Унвонҳои КҶВС ба варзишгарон

Душанбе, 11.08.2015 (АМИТ «Ховар», Фарзонаи Давлат).-Дирӯз дар доираи чорабинии Рӯзи варзишгарон, ки 10-уми август дар  Донишкадаи тарбияи ҷисмонии Тоҷикистон доир гардид,  ба як қатор варзишгарону устодони соҳа унвонҳову сипосномаҳои Кумитаи ҷавонон, варзиш ва сайёҳӣ тақдим карда шуд. 
Дар чорабинӣ муовини якуми Раиси Кумитаи ҷавонон, варзиш ва сайёҳӣ Мавсума Муинӣ, мутахассисону собиқадорони соҳаи варзиш ва ҷоизадорону ғолибони мусобиқаҳои варзишӣ  иштирок доштанд. 
Масъулин ва собиқадорони соҳа оид ба дастоварду пешравиҳои соҳаи варзиш суханронӣ намуда, ба як қатор варзишгарон унвонҳои варзишӣ, ба собиқадорон кӯмакпулӣ, туҳфаҳои хотиравӣ ва ба кормандони соҳа, ки дар татбиқи сиёсати давлатии варзиш саҳми арзанда гузоштаанд, сипосномаи Раиси Кумитаи ҷавонон, варзиш ва сайёҳиро  супориданд. 
Ҳамин тавр варзишгарон Вайсиддин Ибодов, Бахтиёр Гулов, Равзатуллоҳ Исоев, Мавлоншо Акобиров ва Меҳрубон Сангинов соҳиби унвонҳои устоди варзиш гардида, Дилором Каримова- муовини якуми ректори Донишкадаи тарбияи ҷисмонӣ, Қосим Қурбонов-директори Коллеҷи тарбияи ҷисмонӣ, Рустам Давлатов- директори мактаби гӯштин, Эркин Латипов, Элмурод Тағоев, Маҳмадшариф Сулаймонов- мураббиёни гуштини самбо, Дилшод Абдураҳимов, Баҳром Ишратов, Ҷамшед Ҳамроев, Зайдулло Имомалиев- кормандони дастгоҳи марказии Кумита бо сипосномаи Раиси Кумитаи ҷавонон, варзиш ва сайёҳӣ қадрдонӣ карда шуданд.