Варзиш — зидди нашъамандӣ

Душанбе, 05.08.2015. (АМИТ «Ховар», Фарзонаи Давлат).- Шурӯъ аз 5-ум то 9-уми августи соли равон бо ташаббуси роҳбарияти Вазорати корҳои дохилӣ ва дастгирии Созмони амният ва ҳамкорӣ дар Аврупо дар Тоҷикистон дар осоишгоҳи «Садбарг»-и Вазорати корҳои дохилӣ машғулиятҳои дастаҷамъӣ ва гузаронидани лагери тобистонаи варзишгарон — кӯдакону наврасони Шӯрои ҷумҳуриявии «Динамо», таҳти шиори «Варзиш — зидди нашъамандӣ» баргузор мегардад.
Бино ба иттилои Вазорати корҳои дохилии кишвар, субҳи имрӯз, 70-нафар кӯдакону варзишгарони наврас, ки аз намудҳои таэквандо, гуштини юнону румӣ, самбо, дзюдо, шиноварӣ ва футбол дар маҷмааи варзишии «Динамо» машқу тамрин менамоянд, ба осоишгоҳи «Садбарг»-и Вазорати корҳои дохилӣ фиристода шуданд.
Дар  ин рӯзҳо баргузории мусобиқаҳои дастаҷамъӣ аз намуди футбол ва варзиши сабук дар назар дошта, варзишгарони наврас ҳам ба истироҳату фароғат ва ҳам ба варзиш фаро гирифта мешаванд.