Вазири корҳои дохилӣ ба шаҳри Турсунзода сафар кард

Душанбе, 11.08.2015. (АМИТ «Ховар»).- Субҳи имрӯз  Вазири корҳои дохилӣ генерал-лейтенант Рамазон Раҳимзода ба қисми низомии 6592-и Раёсати қӯшунҳои дохилии ВКД, воқеъ дар шаҳри Турсунзода сафар карда, аз рафти корҳои сохтмонӣ дар ин қисми низомӣ дидан намуд.
Тавре ки ба АМИТ «Ховар» итилоъ дода шуд, дар қисми низомии 6592-и Раёсати қӯшунҳои дохилии ВКД барои беҳтар намудани шароити хизмати сарбозону афсарон ва ба талаботи замона ҷавобгӯ гардонидани он корҳои ободонию созандагӣ ва таъмиру таҷдид бомаром идома доранд.
Зимни боздид Вазири корҳои дохилӣ бо сарбозону афсарони қисми низомии мазкур вохӯрӣ анҷом дода, бо шароити хизмати онҳо аз наздик шинос шуд.
Таъкид шуд, ки роҳбарияти Вазорати корҳои дохилӣ барои беҳтар кардани шароити хизмати афсарону сарбозони қисмҳои низомии Раёсати қӯшунҳои дохилӣ аз тамоми имкониятҳо истифода мебаранд, то ин  ки фарзандони халқ дар шароити мусоид хизмати Ватан-Модарро содиқона ва сарбаландона иҷро кунанд.  
«Рамазон Раҳимзода барои бо сифати баланд ва дар мӯҳлати муайяншуда анҷом додани таъмиру таҷдиди казармаҳо, майдончаҳои варзишӣ ва кабудизор кардани гирду атрофи биноҳо ва минтақаҳои хизматӣ, боз ҳам зебо гардонидани саҳни ҳавлии қисми низомӣ ба масъулин дастуру супоришҳои иловагӣ дод», — гуфт корманди маркази матбуоти ВКД ҶТ Хисрав Солеҳов.