Андешаҳои Мавлоно пулест дар табодули фарҳанг байни Шарқу Ғарб

Душанбе, 30.09.2015.(АМИТ «Ховар», Марзия Саидзода).- «Андешаҳои Мавлоно Ҷалолуддини Балхӣ дар бораи ҷомеа ва мақоми инсон дар он, давлат ва давлатдорӣ, рисолати махсуси инсон дар ҷомеа, ки иборат аз донистан, шинохтани худ ва ҷаҳон аст, имрӯз ҳам арзиши худро гум накардаанд, зеро андешаҳои шоир инсонро ба ваҳдат, якпорчагӣ, камолоти маънавӣ, башардӯстӣ ва таҳаммулгароӣ раҳнамун месозанд». Ин нукта  зимни баргузории ҳамоиши илмии «Ҷалолуддин Балхии Румӣ ва умури давлатдорӣ», ки ба ифтихори Рӯзи Мавлоно дар Донишкадаи идоракунии давлатии назди Президенти кишвар доир гардид, зикр шуд.
    Лутфия Абдулхолиқзода -ректори донишкадаи мазкур зимни ифтитоҳи ҳамоиш зикр кард, ки  Мавлоно Ҷалолуддини Балхӣ (1207-1273) ва мероси гаронмояи ӯ пулест барои табодули фарҳанг ва амалҳои башардӯстӣ миёни Шарқу Ғарб. Зикр шуд, ки мероси пурғановати шоир фарогири таҳаммулгароӣ, сулҳи байни мазҳабҳо, рад кардани тафриқа байни инсонҳост. 
    Иштирокчиёни ҳамоиш доир ба ҳаёт ва фаъолияти ориф, шоир ва мутафаккири барҷастаи асри миёнаи адабиёти классикии тоҷик Мавлоно Ҷалолуддини Балхӣ, хусусан дар мавзӯъҳои «Мавлоно Ҷалолуддин Балхии Румӣ ва тарбияи таҳаммулпазирӣ»,  «Ақидаҳои фалсафӣ ва иҷтимоӣ дар ашъори Ҷалолуддин Балхии Румӣ», «Ҷалолуддин Балхии Румӣ ва умури давлатдорӣ, «Мақоми Мавлоно ва Азизуддин Насафӣ дар ташаккулёбии фарҳанги таҳаммулгароӣ», « Бозтоби масъалаи ихтилофҳои мазҳабӣ дар «Маснавии маънавӣ»-и Мавлоно Ҷалолуддини Балхӣ» сухан карданд.
    Мавриди зикр аст, ки шурӯъ аз соли 2007 бо Фармони Президенти кишвар Эмомалӣ Раҳмон ҳар сол 30 сентябр дар Ҷумҳурии Тоҷикистон Рӯзи Мавлоно Ҷалолиддини Балхӣ таҷлил мешавад.