Ҷараёни корҳои сохтмонӣ дар шаҳраки навбунёди Баҳористон
Суғд, 11.09.2015 (АМИТ “Ховар”).-Корҳои ободонӣ ва обёрии заминҳои азхудшавандаи мавзеи Сексарии байни шаҳри Истаравшан ва ноҳияи Ғончӣ, ки дар он ҷо солҳои наздик шаҳраки замонавӣ бо номи Баҳористон бунёд карда мешавад, бомаром идома дорад.
Тавре ки аз мақомоти маҳаллии шаҳри Истаравшан иттилоъ доданд, алъон марҳилаи аввали сохтмони хати об барои ин мавзеъ идома дошта, тавассути қубурҳои 400 миллиметра ба масофаи 2310 метр об бароварда шудааст. Бо ин мақсад истгоҳи обтаъминкунии гурӯҳии шаҳр таъмир гардида, дар он ду обкаши нав насб шудааст ва шинонидани 2 обкаши пуриқтидори дигар дар нақша аст. Илова бар ин, ду чоҳи амудӣ кофта шуда, ҳавзи захиравӣ бо ғунҷоиши 1,5 ҳазор метри мукааб об бунёд ёфтааст.
Дар маҷмӯъ 70 дарсади корҳои лоиҳавии иншоот дар марҳилаи аввал ба анҷом расидааст ва ин хати об то маркази шаҳраки Баҳористон ба масофаи 6,5 километр кашида хоҳад шуд. Баробари ба анҷом расонидани лоиҳаи обёрӣ наздики 35 ҳазор нафар дар ин мавзеъ бо об таъмин хоҳанд шуд.
Бояд хотиррасон кард, ки тибқи нақшаи генералии сохтмони шаҳраки нави Баҳористон дар қисмати шимолу ғарбии шаҳри Истаравшан, дар майдони 200 гектар замин бунёд мегардад ва он аз биноҳои навъи коттеҷи истикоматии як ва дуошёна, инчунин 70 бинои баландошёнаи 7-9-12 ошиёна, ду мактаб, як беморхона, ду боғчаи бачагона, ду майдончаи варзишӣ, бозор, боғи истироҳатӣ, бинои терминали нақлиётӣ, коргоҳи истеҳсоли нон, сехи коркарди ширу гӯшт, коргоҳи истеҳсоли масолеҳи сохтмон, фермаи чорводорӣ, анбори нигаҳдории маҳсулоти кишоварзӣ, анбори нигаҳдории масолеҳи сохтмон, гармхона ва сехи коркарди чӯбу тахта иборат хоҳад буд.
Ғайр аз ин шахраки нав дорои 4,5 га замини корам буда, дар он то 10 ҳазор сокин метавонад бо кишту кор машғул гарданд.








Дар Кумитаи хоҷагии манзилию коммуналӣ бахшида ба Рӯзи Президент чорабинии тантанавӣ баргузор гардид
Имрӯз дар Тоҷикистон ҳавои тағйирёбандаи бебориш пешгӯӣ мешавад
Дар шаҳри Панҷакент маркази хизматрасонӣ ва тарабхона ба истифода дода шуд
Дар Кӯлоб барои омодагӣ ба ҳолатҳои фавқулода ҷаласа доир шуд
Бахшида ба Рӯзи Президент дар шаҳри Бӯстон Рӯзи дарҳои кушод доир гардид
ПАНҶАКЕНТИ ҚАДИМ. Оид ба омӯзиши он конференсияи илмӣ баргузор шуд
Дар шаҳри Панҷакент фаъолияти корхонаҳои саноатӣ тақвият меёбад
Дар Тоҷикистон масоҳати хонаҳои истиқоматӣ бештар гардидааст
Дар шаҳри Кӯлоб бахшида ба Рӯзи Президенти Тоҷикистон ҳамоиш доир шуд
Мардуми ноҳияи Рашт дар симои Пешвои миллат наҷотбахши миллату давлат, кафили сулҳу ваҳдат ва эҳёгари фарҳанги миллиро мебинанд






