Арзи сипоси Президент ба деҳқонону боғпарварони Турсунзода

Душанбе, 18.09.2015. (АМИТ «Ховар»). — Сарвари давлат Эмомалӣ Раҳмон зимни мулоқот бо роҳбарон ва сокинони шаҳри Турсунзода ба деҳқонону боғпарварони ин шаҳр барои рӯёнидани ҳосили фаровон арзи сипос намуд. Аз ҷумла, Президенти кишвар аз кори ду деҳқони пуртаҷриба бобои Ҳоҷӣ Камол ва Ҳоҷӣ Неъмат тавсиф карда, иброз дошт, ки таҷрибаву малака ва дастовардҳои хуби деҳқонони шаҳр нишон медиҳад, ҷамъоварии ҳосили баланд дар баробари таъмини бозори истеъмолии кишвар ва афзоиши иқтидори содиротии мамлакат, инчунин боиси беҳтаршавии даромади сокинон ва болоравии сатҳи зиндагии онҳо мегардад.  
Бояд гуфт, ки дар солҳои 2000 – 2015 дар шаҳри Турсунзода майдони кишти ғалладонагиҳо беш аз ду баробар афзуда, майдони боғу токзор аз 800 гектар то ба 2 ҳазору 800 гектар расонида шуда, дар ҳашт моҳи соли ҷорӣ истеҳсоли меваю ангур нисбат ба ҳамин давраи соли гузашта мутаносибан 28 ва 42 фоиз зиёд гардидааст. 
Дар натиҷа ҳазорҳо ҷойҳои нави корӣ муҳайё гардида, ҳаҷми истеҳсоли маҳсулоти кишоварзӣ бамаротиб зиёд шудааст. 
Тибқи маълумот кишоварзони шаҳр нақша доранд, ки аз ҳисоби талу теппаҳо майдони боғу токзорро боз 1000 гектар афзоиш диҳанд.