Беҳрӯз- ғолиби мусобиқа дар Қазоқистон

Душанбе, 16.09.2015.(АМИТ «Ховар»).-Дар шаҳри Алмаатои Ҷумҳурии Қазоқистон мусобиқаи байналмилалӣ оид ба муҳорибаҳои омехта доир гардид. Дар мусобиқа 2 варзишгари тоҷик Мақсуд Аминов ва Беҳрӯз Зуҳуров бо мураббӣ Шерзод Нормуродов таҳти роҳбарии Фарҳод Муртазоев  ширкат варзиданд.  Дар қатори варзишгарони дигар кишварҳо Беҳрӯз Зуҳуров тавонист  шарафи кишвари моро ҳимоя кунад. Беҳрӯз бо варзишгари қазоқ Нариман Мусоев, ки зодаи Чеченистон буд,  дар вазни 66 кг ҳунарнамоӣ намуд ва дар намуди касбӣ пеш аз муҳлат бо усули буғӣ кардан ба рақибе, ки аз рўи вазн аз ӯ зиёдтар буд, дастболо гашт. Ин пирўзии нахусти Беҳрӯз набуда, ҳамчунин ў барандаи мусобиқаҳои байналмилалии шаҳри Душанбе барои дарёфти камарбанди шоҳ Исмоили Сомонӣ ва ҷоизадори Ҷоми ҷаҳон дар Қриму Сочи мебошад. Фарҳод Муртазоев иброз намуд, ки онҳо аз ин пас дар мусобиқаҳои бонуфузи байналмилалӣ ширкат ва варзишгарони лаёқатмандро ба онҳо сафарбар менамоянд.