Боздиди доктор Майер аз шаҳри сайёҳӣ

Душанбе, 18.09.2015.(АМИТ «Ховар», Марзия Саидзода).- Доктор Георг Макс Майер -роҳбари Бунёди Ҳаннс Зайдели Олмон ба шаҳри Норак ташриф оварда,  бо хатмкардагони магистратураи Донишкадаи идоракунии давлатии назди Президенти кишвар, ки дар мақомоти иҷроияи ҳокимияти давлатии шаҳри Норак фаъолият доранд, мулоқот намуд. Бояд тазаккур дод, ки  Донишкадаи идоракунии давлатии назди Президенти  кишвар дар асоси созишномаи ҳамкорӣ бо Бунёди Ҳаннс Зайдели  Олмон ҳар сол аз рӯи ихтисоси  «Идоракунии давлатӣ» магистрҳоро омода месозад. Тибқи  созишномаи дуҷониба бунёд бо мақсади огоҳӣ ёфтан аз фаъолияти кории минбаъдаи хатмкардагон, ки аз ҳисоби хизматчиёни давлатианд, ба ҷойи кори онҳо омада, бо хатмкардагон вохӯрӣ доир менамояд. 
           Доктор Майер ва ҳайати магистрантҳои донишкадаро Ҳурматзода Фатҳулло Зариф -раиси шаҳри Норак ба ҳузур пазируфта, ба онҳо туҳфаҳои хотиравӣ такдим намуд. Инчунин  доктор Майер ва гурӯҳи магистрантҳо аз обанбори Норак ва табиати зебои ин шаҳри сайёҳӣ дидан намуданд.