Чемпионҳои Осиё ғолиб омаданд

Душанбе, 09.09.2015. (АМИТ «Ховар»). — Дастаи мунтахаби футболи Тоҷикистон дар даври чаҳоруми сабқати интихобии Ҷоми ҷаҳон-2018 дар минтақаи Осиё дар гурӯҳи «В” аз  тими миллии Австралия, қаҳрамони феълии Осиё, бо ҳисоби 0:3 мағлуб шуд. Ин бозӣ шаби сешанбеи 8 сентябр бо ҳузури 19 ҳазор тамошобин дар Варзишгоҳи марказии Душанбе баргузор шуд. То дақиқаи 57-ум ба футболбозони мо муяссар шуд, ки ба дастаи Австралия муқобилияти сахт нишон диҳанд. Аммо, таҷрибаю малакаи футболбозони номдори ин кишвар ва тайёрии хуби ҷисмониашон имкон дод, ки дар ин вохӯрӣ пирӯз шаванд. Дар дақиқаи 57-ум, Марк Миллиган ҳисобро боз кард. Ду голи дигари меҳмононро капитани австралиягиҳо Тим Кеҳил дар дақиқаҳои 74-ум ва 90+1 ба ҳадаф расонд. 
Дар ин гурӯҳ дастаи мунтахаби Урдун бар Бангладеш бо натиҷаи 4:0 ғалаба карда, мавқеашро дар ҷадвал беҳтар кард. Акнун футболбозони Тоҷикистон бозии навбатии худро бо дастаи мунтахаби Қирғизистон рӯзи 8 октябр дар Қирғизистон барпо мекунанд.