Дар 5 садамаи фоҷеавӣ 4 ноболиғ ба ҳалокат расид

Душанбе, 25.09.2015, (АМИТ «Ховар»). — Дирӯз, 24-уми сентябр дар шаҳри Душанбе ронандаи 41 солаи мошини тамғаи “Опел-Астра” ҳангоми ҳаракат бо кӯчаи Мир Саид Алии Ҳамадонӣ, аз самти кӯчаи Зарафшон ба самти кӯчаи Баҳовуддинови пойтахт, пиёдагард, писарбачаи 7-солаи сокини шаҳри Душанберо пахш намуд. Писарбача ҷароҳати вазнини ҷисмонӣ бардошта, ҳангоми ба беморхона дастрас намудан дар роҳ ба ҳалокат расидааст. Як рӯз қабл аз ин ронандаи 22-солаи мошини тамғаи “Мерседес-Бенс” ҳангоми ҳаракат аз самти кӯчаи Мастонгулов ба самти кӯчаи Айнӣ, дар рӯ ба рӯи бинои корхонаи “Роҳи Абрешим” аз уҳдаи идораи воситаи нақлиёт набаромада, ҷавондухтари 20-сола ва духтарчаи 11-солаи сокинони шаҳри Душанберо пахш намудааст. Духтарчаи ноболиғ ҷароҳати вазнини ҷисмонӣ бардошта, ҳангоми ба беморхона дастрас намудан, дар роҳ ба ҳалокат расид. Дар ин рӯз, инчунин ронандаи мошини тамғаи “ГАЗ-3302”, сокини 30-солаи ноҳияи Рӯдакӣ ҳангоми ҳаракат бо паскӯчаи Ломоносови шаҳри Душанбе духтарчаи 1-солаи сокини маҳалиро пахш намудааст. Дар натиҷа хурдсол ҷароҳати вазнини ҷисмонӣ бардошта, дар ҷойи ҳодиса ба ҳалокат расидааст. 
Ҳамчунин дар ин рӯз, мошини тамғаи “УАЗ-469”, таҳти идораи сокини 36-солаи ноҳияи Балҷувон ҳангоми бозгашт аз бозори марказии ноҳия ба самти ҷамоати деҳоти Амиршоев, ногаҳон бозистода ба қафо ҳаракат мекунад. Дар натиҷа писарбачаи 9-солаи ронанда, ки болои бордони мошин буд, ба замин афтода, ҷароҳати вазнини ҷисмонӣ мебардорад ва ҳангоми ба беморхона дастрас намудан, ба ҳалокат расид. 
24-уми сентябр, инчунин дар роҳи мошингарди “Айнӣ-Панҷакент” ронандаи мошини тамғаи “КАМАЗ-53212”, сокини 55-солаи ноҳияи Панҷакент бехатарии ҳаракатро таъмин карда натавониста, ба мошини тамғаи “Опел-Астра”, таҳти идораи сокини 37-солаи ноҳияи Панҷакент бархӯрд.  Дар натиҷаи садама ронандаи мошини “Опел-Астра” ҷароҳати вазнини ҷисмонӣ бардошта, ба ҳалокат расидааст.