Ифтитоҳи маркази саломатӣ дар ноҳияи Ванҷ

      Ванҷ, 21.09.2015 (АМИТ «Ховар», Файз Мирҳасан).-Дар деҳаи Гармчашмаи ҷамоати Рованди ноҳияи Ванҷ бинои маркази саломатӣ бо таҷҳизоти муосири тиббӣ мавриди баҳрабардорӣ қарор гирифт. Марказ аз панҷ утоқи дорои тачҳизоти муосир иборат буда, бо оби гарм низ таъмин мебошад.
Бинои мазкурро Ҷамъияти дорои масъулияти маҳдуди «Садбарг»  ба истифода додааст.
       Деҳаи Гармчашма аз деҳоти дурдасти ноҳияи Ванҷ ба шумор рафта, каме поинтар аз пиряхи Федченко ҷойгир аст.
Тарҳи мазкур дар натиҷаи як қарордоди муштарак байни Вазорати тандурустии ҷумҳурӣ ва Хадамоти ҳифзи сиҳатии Бунёди оғохон амалӣ шуд.
    Дар ҷамоати Рованд ду маркази саломатӣ ва 8 бунгоҳи тиббӣ мавҷуданд ва  як табибу 22 ҳамшираи шафқат ба бештар аз 6 ҳазор аҳолии ин ҷо хизмати тиббӣ мерасонанд.