Кӯмаки навбатӣ ба осебдидагони офати табиии вилояти Бадахшон

Шуғнон 03. 09. 2015 (АМИТ «Ховар», Файз Мирҳасан). — Бахши вилоятии Ҷамъияти ҳилоли аҳмари Тоҷикистон ба 43 хонаводаи деҳаи Барсеми ноҳияи Шуғнон, ки алъон дар шаҳрчаи хаймавӣ  иқомат доранд, маводи ғизоӣ кӯмак кард.
Раҳбари ҷамъияти мазкур  Тоҷиниссо Мамадинова гуфт, ки аз рӯзи аввали офат мо ҳафтае як маротиба аз ҳоли осебдидагон хабар гирифта, ба онҳо кумакҳои равониву моддӣ мерасонем.
— Бо кӯмаки аъзоени ҷамъият барои кӯдакони шаҳрча либосҳои зимистона ҷамъ намуда, дар ҳафтаи оянда ба онҳо тақдим менамоем. Барои хонандагони мактаби ибтидоӣ се хайма муҷаҳҳаз бо асбобу анҷоми таълимӣ таъсис дода шудааст, ки толибилмон дар он дарс мехонанд, афзуд ӯ.