Китоби нав

Душанде, 04.09.2015.(АМИТ «Ховар», Ҳотами Шариф). «Ахтари беғуруб», чунин ном дорад китоби нави рӯзноманигор ва нависандаи варзида Маҳмадалӣ Бахтиёров, ки дар нашриёти «Ашӯриён» нашр гардид. Китоб ба фаъолияти арбоби давлатӣ, марди поктинату хирадманд, роҳбари боэътимод, собиқ ҷонишини раиси шӯрои комиссарони халқи Ҷумҳурии  Тоҷикистон Хӯҷам Шодмонов бахшида шуда, тарафҳои номаълуми ҳаёту фаъолияти номбурдаро ифшо гардонидааст. Хонанда бо мушкилоти сохтмони шӯравӣ ва созандакориҳо дар бунёди сохтмони роҳи калони Помир шинос хоҳад шуд.
  Муаллифи китоб Маҳмадалӣ Бахтиёров асарҳои «Рӯшон — диёри Равшандилон», «Фарзона фарзанди асил», «Таърихи Рӯшон» ва ғайраро бо заҳмати хеле зиёд дар натиҷаи ҷустуҷӯйҳои пайвастаи эҷодкорона ба дасти хонандагон расонидааст.