Курсҳои омӯзишӣ барои соҳибкорзанони кишвар

Хуҷанд, 11.09.2015 (АМИТ «Ховар»).-Иттифоқи занҳои соҳибкори Латвия дар ҳамкорӣ бо Иттифоқи миллии занҳои соҳибкори Тоҷикистон (ИМЗСТ) омӯзишҳоро дар мавзўи «Ҳавасмандгардонӣ» барои занҳо ташкил намуданд. Курсҳои мазкур бо соҳибкорзанон дар минтақаҳои гуногуни  кишвар баргузор   мешаванд.
Дар айни замон курсҳои омӯзишӣ дар минтақаи вилояти Суғд ҷараён доранд, ки мақсади онҳо ҳавасмандгардонии занҳо ба  оғози  тиҷорати  худ ва рушди хизматрасониҳои нави ИМЗСТ барои занҳои соҳибкор мебошад.
Ёдрас мешавем, ки омӯзишҳо қисме аз  лоиҳаи «Васеъгардонии ҳуқуқу имкониятҳои иқтисодии занҳои Тоҷикистон (TWEET)» мебошанд, ки  аз ҷониби Иттиҳоди Аврупо дар доираи «Барномаи сармоягузории Осиёи Марказӣ» маблағгузорӣ мегарданд. Лоиҳа ба беҳтар гардонидани фазои тиҷорат,  барои  ташкил ва амалӣ намудани соҳибкории хурду миёна дар Тоҷикистон, ки аз тарафи занҳо роҳбарӣ карда мешаванд, равона шудааст. Буҷаи умумии лоиҳа 428,000 евро буда, аз он 364,225 евро аз ҷониби Иттиҳоди Аврупо маблағгузорӣ мегардад.