Мастӣ ба пастӣ мебарад

Душанбе, 22.09.2015, (АМИТ «Ховар»). — Зимни гузаронидани чорабиниҳои оперативӣ-ҷустуҷӯӣ аз ҷониби кормандони милитсия муайян карда шуд, ки сокини 41-солаи шаҳри Панҷакент, ки қаблан бо моддаи 104, қисми 2 Кодекси ҷиноятии Ҷумҳурии Тоҷикистон суд шудааст, санаи 20-уми сентябри соли равон дар ҳолати мастӣ бо марди 25-солаи сокини ҳамин шаҳр муноқиша карда, бо корд якчанд маротиба ба қисмати тахтапушташ задааст. Дар натиҷа, ҷабрдида ҷароҳатҳои вазнини ҷисмонӣ бардошта, дар беморхона бистарӣ гаштааст. Нисбат ба ҳодиса мазкур парвандаи ҷиноятӣ оғоз гардида, тафтишот идома дорад.