Намоиши ду филми кӯтоҳ дар ДДФСТ

Душанбе, 29.09.2015. (АМИТ «Ховар», Таҳминаи Худоёр).-Имрӯз  дар толори  Донишкадаи давлатии фарҳанг ва санъати Тоҷикистон (ДДФСТ) ба номи Мирзо Турсунзода  нахустнамоиши ду филми кӯтоҳ- «Хобидан мехоҳам», мазмун аз ҳикояти А.П.Чехов ва «Гули бахт»  бо ташаббуси роҳбари бадеӣ Юнус Юсупов ва бо дастгирии директори  Киностудияи давлатии «Тоҷикфилм» доир гардид, ки дар он  устодону  донишҷӯёни донишкада ва меҳмонон ширкат варзиданд. Нахустнамоиши ду филм «Хобидан мехоҳам» ва «Гули Бахт» кори таълимии донишҷӯёни Донишкадаи давлатии фарҳанг ва санъати Тоҷикистон  Фотима Раҳимова ва Ҳусейн Азизов буда, нақши асосиро дар филми «Хобидан мехоҳам» -духтараки хурдсол Омина ва дар филми  дуюм «Гули бахт» Мариана Баракбаева ва Соро Сабзалиева иҷро намуданд.
Дар аввалин филмҳои таълимии донишҷӯёни донишкада масъалаҳои муҳим  ва мушкили иҷтимоӣ баррасӣ гардиданд. Дар филми  «Хобидан мехоҳам» мушкилоти  муҳоҷирон дар ҷомеа ва  дар филми «Гули бахт» масъалаи  ба зиндагии мустақилона дер қадам мондани  духтарон нишон дода шуд. Филмҳои мазкур бо таклифу пешниҳодҳо ва саволҳои иштирокдорон ба  иҷрокунандагони нақшҳои асосӣ анҷом ёфтанд.