Номаи шодбошии Президенти Ҷумҳурии Федеролии Олмон ба Эмомалӣ Раҳмон

 Душанбе, 08.09.2015. (АМИТ «Ховар»).

Ҷаноби Президент,

Солгарди Рӯзи Истиқлолияти Ҷумҳурии Тоҷикистонро ба Шумо  ва тамоми мардуми кишваратон шахсан аз номи худам ва тамоми ҳамватанонам табрик мегӯям.
Аз лаҳзаи соҳибистиқлолии Ҷумҳурии Тоҷикистон байни кишварҳоямон дар риштаҳои гуногун муносибатҳои зуд рушдкунанда ва эътимодбахш ба роҳ монда шудааст. Тоҷикистон барои Олмон дар Осиёи Марказӣ шарики муҳим  ба шумор меравад. Дар оянда ҳам мо мехоҳем кишвари Шуморо дар роҳи идомаи ташаккули сохторҳои демократия, давлати ҳуқуқбунёд ва низоми бозорӣ ҳамаҷониба дастгирӣ намоем. Итминон дорам, ки чунин роҳи рушд барои тавсеаи минбаъдаи ҳамкориҳои дуҷониба бар нафъи ҳар ду кишвар зербинои олӣ хоҳад буд.  
Ба Шумо некӯаҳволӣ ва тансиҳатии комил орзу намуда, ба мардуми Тоҷикистон, сулҳу озодӣ ва некӯаҳволиро таманно дорам.

Йоахим Гаук
Президенти Ҷумҳурии Федералии Олмон