Омодагии ҷиддӣ ба даъвати тирамоҳӣ

Душанбе, 30.09.2015. (АМИТ «Ховар», Лайло Тоирӣ). — Масъулини камиссариатҳои ҳарбии шаҳру навоҳии ҷумҳурӣ барои оғози муваффақонаи хизмати пуршарафи ҳарбӣ омодагии ҷиддӣ мегиранд.
Пас аз омӯзиши ҳаматарафа аз ҷониби афсарони масъули қисми ҳарбӣ, наваскарон тӯли 1 моҳ ва беш аз ин ба курси тайёрии наваскарӣ фаро гирифта шуда, дар ин давра аз рӯйи фанҳои таълимӣ нозукиҳои хизмати ҳарбӣ ва дигар муҳимоти онро аз худ менамоянд.
Тавре ки аз Вазорати мудофиаи ҷумҳурӣ хабар доданд,  имрӯзҳо барои қабули наваскарон ва идомаи хизмати пуршарафи эшон дар қисми ҳарбии 41008-и Қувваҳои ҳарбӣ- ҳавоӣ ва мудофиаи зидди ҳавоӣ омодагии ҳамааҷониба дида шуда, нуқтаи тиббӣ, ошхона, хобгоҳи сарбозон, марказҳои таълимию методӣ ва синфхонаҳои муҷаҳҳаз бо лавозимоти зарурии омӯзишӣ фароҳам оварда шудаанд, ки имконият медиҳанд  ҳайати шахсии сарбозон тамоми соатҳои дарсӣ, таълиму тадриси фанҳои гуногуни низомӣ ва машқу тамринҳои ҳарбиро ба таври васеъ аз худ намоянд.