Румӣ танҳо марбут ба як миллат нест!

Хоруғ, 25.09.2015 (АМИТ «Ховар», Файз  Мирҳасан).-Дар китобхонаи  ба номи Ҳофизи Шерозии  шаҳри Хоруғ бо ширкати шоирон, устодону донишҷӯёни Донишгоҳи давлатии Хоруғ  конфронси илмӣ-амалӣ бахшида ба ҳаёт ва фаъолияти  шоир ва мутафаккири бузурги  форсу тоҷик  Ҷалолиддини Румӣ баргузор гардид.
Иштирокчиён аз аҳамияти осори гаронарзиши ин мутафаккир суҳбат карда, зикр доштанд, ки бо гузашти солҳо қадри сухану ҳикматаш ҳам дар Шарқ ва ҳам дар Ғарб  кашишу ҷозибаи бештар пайдо мекунад. Румӣ дар замони худ тавонист ғояҳои башардӯстонаи исломи нобро ба тамоми инсонҳои дунё сарфи назар аз боварию эътиқод тавзеҳ диҳад. Румӣ аз доираи як миллат берун шуд ва дар мақоми тамаддуни башарӣ ҷо гирифт. Акнун Румӣ танҳо ба миллати форсу тоҷик тааллуқ надорад, он моли тамоми дунё аст,-таъкид шуд дар нишаст. 
 Баъди ироаи маърӯзаҳо байни хонандагону донишҷӯён ва устодон оид ба паҳлӯҳои эҷодиёти ин шоири оламшумул мубоҳиса сурат гирифт.