Сабзиши ниҳолҳо дар ҷумҳурӣ ба беш аз 80 дарсад расидааст

Душанбе, 25.09.2015. (АМИТ «Ховар», Назир Назиров).-Ба иттилои  Шуъбаи назорати давлатии ҳифз ва истифодаи олами набототу ҳайвоноти Кумитаи ҳифзи муҳити зисти назди Ҳукумати Ҷумҳурии Тоҷикистон назорати ниҳолҳои шинонидашуда дар мадди назари нозирони мақомоти соҳавӣ дар ҷойҳо қарор дорад. 
Дар ин мавсим дар қаламрави ҷумҳурӣ  3 млн. 288 ҳазору  672 бех ниҳол шинонида шуда, аз ин шумора дар ноҳияи Шаҳристони вилояти Суғд 500 ҳазор қаламча, инчунин дар ҷамоати  деҳоти Бунҷикат 500 ҳазор қаламчаи  тирак ва бед шинонида шудааст.
Тибқи маълумот то кунун дар ҳудуди ҷумҳурӣ 2 млн. 752 ҳазору 149 ниҳол дар ҳолати хуби сабзиш қарор дошта, иҷрои он 84 фоизро ташкил медиҳад.