Тағйироту дигаргуниҳо дар сомонаи ширкати «Сомон-Эйр»

Душанбе, 24.09.2015. (АМИТ «Ховар»,). Ширкати «Сомон-Эйр» сомонаи худро вобаста ба талаботи замони муосир дигаргун карда ба он бахшҳои навро илова намуд. Акнун истифодабарандагон имкон пайдо карданд, ки ҳолати парвози ҳавопайморо мустақиман тамошо кунанд. Ширкати ҳавопаймоӣ барномаи навро барои Android ба кор даровард, ки истифодабарандагони таҷҳизоти мобилӣ бо ёрии он бо маҳсулот ва хизматрасониҳои электронии ширкати ҳавопаймоӣ шинос мешаванд ва маълумоти умумиро дар бораи хизматрасониҳои «Сомон Эйр» ба даст меоранд. Барномаи Android дар аксари таҷҳизоти мобилии муосир — Samsung, HTC, SonyEricsson, Motorola, LG насб шудааст.
Ширкати ҳавопаймоии «Сомон-Эйр» бо таҳияи барномаи мобилӣ барои Apple (IOS) машғул аст, ки ба наздикӣ дастраси истифодабарандагон қарор мегирад.
Хотиррасон мекунем, ки феълан ширкати «Сомон Эйр» парвозҳоро аз Тоҷикистон ба самтҳои Олмон, АМА, Туркия, Хитой, Русия ва Казоқистон муваффақона иҷро менамояд.