Таҷлили ҷашни Истиқлолият дар ДМИТ

Душанбе, 09.09.2015. (АМИТ «Ховар»).-  Ба муносибати 24-умин солгарди Истиқлолияти давлатии Ҷумҳурии Тоҷикистон дирӯз дар Донишкадаи молия ва иқтисоди Тоҷикистон (ДМИТ) чорабинии тантанавӣ доир  гардид.
Ректори донишкада Ашӯрбой Солеҳзода зикр намуд, ки истиқлолият рамзи соҳибдавлатии тоҷикон мебошад. Тӯли солҳои истиқлолият худшиносию худогоҳии мардум таҳким ёфта, мардуми бохиради кишвар бо роҳбарии Президенти кишвар Эмомалӣ Раҳмон дар муддати кӯтоҳ муттаҳид гаштанд. Он миллате, ки дорои истиқлолияти комил аст, дар арсаи ҷаҳонӣ соҳиби номи нек мегардад. Чун тақдири минбаъдаи кишвар дар дасти мо — наслҳои имрӯза аст, ҳар яки моро водор месозад, ки масъулиятшинос бошем ва ба қадри неъматҳои истиқлолият бирасем. Ҳамзамон ректори донишкада  афзуд, ки дар солҳои истиқлолият маориф ва илми ватанӣ рушд ёфта, ба комёбиҳои назаррас ноил гаштааст. 
Сардори Раёсати кор бо ҷавонони Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон Фаррух Изатуллоев ҳамагонро табрик намуда, изҳор дошт, ки ба шарофати истиқлолият дастовардҳои шаҳрвандони кишвар, бахусус ҷавонон афзудааст. Ҷавонони саодатманди тоҷик пуштибони сиёсати пешгирифтаи хирадмандонаи Сарвари давлат буда, барои рушду инкишофи ҷомеа кӯшишҳо менамоянд. 
Инчунин ассистенти кафедраи фанҳои гуманитарии донишкада Фаридун Сафарзода дар мавзӯи «Дастовардҳои даврони истиқлолият» маърӯза намуда афзуд, ки яке аз дастовардҳои истиқлол — қабули Сарқонун мебошад, ки он имрӯз аз ҷониби коршиносон ҳамчун яке аз беҳтарин ва демократитарин сарқонунҳои дунё эътироф шудааст.