100 ҳазор сомонӣ- барои ҷоизадорони «Ҷоми Президенти Тоҷикистон»

Душанбе, 01.10.2015. (АМИТ «Ховар»).-5-уми октябри соли равон дар шаҳри Душанбе 3-юмин мусобиқаи байналмилалӣ оид ба гӯштини дзюдо барои дарёфти «Ҷоми Президенти Тоҷикистон» баргузор мешавад. Дар мусобиқаи мазкур паҳлавонони 15 кишвари ҷаҳон, аз қабили Афғонистон, Русия, Беларус, Қирғизистон, Қазоқистон, Туркманистон, Тоҷикистон, Ӯзбекистон, Эрон, Миср, Муғулистон, Италия, Куба ва Юнон иштирок намуда, барои «Ҷоми Президент» миёни ҳам рақобат мекунанд.
Ба иттилои президенти федератсияи дзюдои Тоҷикистон Нурулло Лоиқов, варзишгарон миёни ҳам дар вазни мутлақ рақобат мекунанд. -Барои ҷоизадорони мусобиқа, ки ҷойҳои намоёнро ишғол мекунанд, 100 ҳазор сомонӣ мукофот муайян гардидааст. Барои ғолибони мусобиқа  ҷойҳои якум, дуюм ва ду ҷойи сеюм муайян гардидааст,-афзуд Нурулло Лоиқов.
Ҳамчунин ӯ гуфт, ки мақсад аз баргузории мусобиқаи мазкур тарғибу ташвиқи тарзи ҳаёти солим ва рушди ин намуди варзиш мебошад, зеро ки имрӯз кишвар ҳама гуна имкониятро доро мебошад ва бояд аз он  самаранок истифода намоем.
Дар мусобиқа, ки бо дастгирии Ҳукумати Ҷумҳурии Тоҷикистон, Кумитаи ҷавонон, варзиш ва сайёҳӣ дар ҳамкорӣ бо Федератсияи дзюдои Тоҷикистон доир мешавад, беш аз 40 паҳлавон ширкат меварзад.
Ёдрас мешавем, ки мусобиқаи мазкур аз соли 2013 ҳамасола бо иштироки доираи васеи паҳлавонони Осиёву Аврупо, Африқову Амрико гузаронида мешавад.